Markaziy Osiyo Yevrosiyodagi eng jadal rivojlanayotgan investitsiya yo‘nalishlaridan biriga aylanmoqda. O‘tgan yil davomida mintaqa ichida savdo hajmi 10,7 milliard AQSh dollariga yetdi, umumiy investitsiyalar hajmi esa 17 foizga oshdi.
Mintaqaning xalqaro maydondagi mavqei ham mustahkamlanib bormoqda. “Markaziy Osiyo+” formati doirasidagi hamkorlik tobora institutsional tus olib, davlatlar yirik global platformalarda muvofiqlashtirilgan pozitsiyalar bilan chiqmoqda. Ozarbayjonning ushbu formatga qo‘shilishi kutilayotgani esa mintaqaning xalqaro maydondagi umumiy ovozini yanada kuchaytirishi mumkin.
O‘zbekiston va Ozarbayjon o‘rtasidagi ikki tomonlama hamkorlik ham yangi bosqichga chiqmoqda. Makroiqtisodiy ko‘rsatkichlar hamkorlikning barqaror va ijobiy rivojlanayotganini tasdiqlaydi. So‘nggi sakkiz yil davomida O‘zbekistonga 120 milliard AQSh dollari miqdorida to‘g‘ridan-to‘g‘ri xorijiy investitsiyalar jalb qilingan bo‘lsa, 2026-yilda yana 50 milliard dollar investitsiya jalb etish rejalashtirilgan. O‘zbekiston va Ozarbayjon o‘rtasidagi savdo aylanmasi 2030-yilgacha 1 milliard AQSh dollariga yetishi kutilmoqda. Bunga allaqachon imzolangan sanoat kooperatsiyasi bo‘yicha kelishuvlar xizmat qilmoqda.
AUIC mintaqa bo‘ylab qator investitsiya tashabbuslarini amalga oshirmoqda. Kompaniya raqamli infratuzilmaga 1,7 million dollar, oliy ta’lim sohasiga 2 million dollar va chakana savdo sektoriga 15 million dollar investitsiya kiritgan. Bundan tashqari, yana 15 ta loyiha faol ishlab chiqish bosqichida.
